آلو العثماني…انت فينك آصاحبي..وفين دراري الوزراء..؟

محمد الشمسي

0

مددت يدي إلى هاتفي من تحت وسادتي، فقد بتنا ننام في حجرنا الصحي  والأيادي على الهواتف، مثلما  ينام جندي الحراسة والأصبع على الزناد، صفعني نور شاسته وأنا أشعله ، وقعت عيني على خبر يقول أن رئيس الحكومة سعد الدين العثماني ظهر أخيرا ، لكن فقط في عالمه الافتراضي، ظهر مغردا علما أن  صوته ” ماشي تاع التغريد” ،  ويقول للناس أن الخط الهاتفي لآلو يقظة استقبل كذا وكذا من المكالمات وأن …وأن…. وعموما كانت تغريدته خاوية وكأنه أراد بها أن يسجل الحضور حتى لا ينساه الناس بعد أن نسيهم هو وتناساهم، وعدت إلى نومي مادام الحجر الصحي لم يجعل لاستيقاظنا طعما ولا مسعى ، لكن خلال غفوتي رأيت فيما يرى النائم أني أهاتف رئيس الحكومة على رقم لم أذكره وخاطبته:

” آلو العثماني …أنت فينك آصاحبي…الدنيا مقلوبة وأنت غابر… خصك تبان للناس آصاحبي …والله تا عيقتي …بزاف على الخوف وبزاف على احترام الحجر الصحي، ياك في قانون الطوارئ الصحية قلتو أن الخروج يكون للضرورة القصوى ، وأنت رئيس حكومة علاه هادي ماشي ضرورة قصوى ؟ ولمعندكش رخصة التنقل الاستثنائي ؟ عيط للمقدم يجبها لك للدار …راك رئيس حكومة زعما…خرج آصاحبي للناس …ياك عييتونا بالكلام على سيدنا عمر ابن الخطاب رضي الله عنه .. كان كيتسارا على الرعية ويسول فيها في الشدة والرخاء وفي الحر والقر …وفينك دابا ؟ مالك هربتي وتخبيتي؟ سيدنا عمر كان كيخلي الناس مع الكوارث فاص أفاص ويسلت عليهم  ؟…شتى الشفاوي فوق المنابر شحال ساهل…كون كانو الانتخابات كراك من دار لدار دقان وبوسان…

قول ليا آسعد …وفين الدراري دياولك؟…شكون الدراري؟…الوزارا آصاحبي…الوزراء؟.. فين غبرو  كاملين…ياك الحكومة في خدمة الشعب…بانو آصاحبي بانو…

كيفاش الوزراء في فيلاتهم؟ …علاه شكون غادي يواجه هاد كورونا …تواجهو خالتي؟ …

ولاحيت فيلاتهم متيسعين وفيهم لابيسين …واقيلا راهم فيها مخيمين… ومكيحسوش لا بقنطة لا بملل ..ولكن مع كورونا التيساع في القلب…

واسي العثماني ياك أنت طبيب نفساني …خرج آصاحبي عند المواطنين من التلفزة والراديو وعطيهم نصائح نفسية بحال اللي كتعطي للمرضى في العيادة ديالك …وعلى الاقل شرب عا الدوا ديال الخلعة اللي كتعطي للمرضى باش وجهك يرجع فيه الدم راه آخر مرة كان وجهك مسكوف وصفر  ….راه الناس مخلوعين …مخلوعين علك ومخلوعين من كورونا …حيت الخلعة كتقتل المناعة …كون راجل آصاحبي وتوكض شوية …ياك انت فقيه وحامل كتاب الله…

آلو سي العثماني واش كتسمعني؟… الناس كيقولو أنك مصدقتيش معاهم راجل…عا سينيتي قرار الطوارئ الصحية وقلتي من هنا دازو …هاد الشي اللي كيقولو الناس…وسمع سمع الناس دخلهم فك الشك آصاحبي … راهم كيسولو علك واش انت بصح طبيب نفساني؟ …صدقتي خواف فوق لقياس…

آلو …آلو…العثماني مبقيتش كنسمعك مزيان…آلو …آلو..واقيلا هبطتي للكاف ديال الفيلا ديالك…مبقاش عندك الريزو …يتعذر الاتصال بمخاطبكم…

حينها استيقظت وأنا أحدث نفسي” وأنت إيمتا كان عندك الريزو؟”…

قد يعجبك ايضا المزيد عن المؤلف

اترك رد

لن يتم نشر عنوان بريدك الإلكتروني.

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.