مجلس جهة الدار البيضاء-سطات يستنجد بالأمريكيين لإعداد مخطط التنمية
▪︎مجلس جهة الدار البيضاء-سطات يستنجد يالأمريكيين لإعداد مخطط التنمية
▪︎فلوس اللبن يديهم زعطوط
الفلوس شيطة في مجلس جهة الدار البيضاء_سطات، وملقاو ميديرو بيها، لدرجة مشاو حتى الولايات المتحدة الأمريكية يجيبو مكتب دراسات من ولاية بوسطن، واعطاوه 864 مليون سنتيم باش يقاد ليهم شي حاجة اسمها “مخطط تنمية د الجهة” !!!
طاشمة د البشر في الجهة انتخبهم البيضاويون نهار 8 شتنبر 2021 على اساس برامج انتخابية ومخططات ورؤية وتصور، ومن بعد مللي نجحوا تستفوا لينا في المكتب المسير بكرافاطاتهم، مشاو حطوا يديهم في صندوق مجلس الجهة، واعطاوها لمكتب دراسات… ومن بعد رجعو اللور…
اش دار بسلامة هاد المكتب باش يلهف 864 مليون سنتيم في 6 أشهر؟
والو غير تعاويذ المعطي المعطي وغير تعمار الشوارج وديك الهضرة الخاوية د benchmark…(اي واحد بغيتي تخلعو اليوم جبد ليه هاد benchmark مع ان العملية لا تعدو إجراء مقارنة مع تجارب في المغرب وتجارب في الخارج، لكن مللي كتكولها بلونغلي كتبان زعما واعر)!!!
بارح حضرت للعرض للي قدمو هاد المكتب د الدراسات Boston Consulting group وقدم فيه العروض العريضة لخطاطة مخطط التنمية 2022 (للي سلات اصلا) و2027…
لا شيء يذكر غير التخربيق للي ممكن يديرو ابسط موظف في الجهة..
والله منكذب عليكم: كاين شي أطر وكفاءات وخبراء في الجهة اوعر من الوعورية… لكنكم تحبون البراني وتغدقون عليه أموال البيضاويين بكرم حاتمي!!!
والكارثة الكبرى، ان رئيس مجلس الجهة، هو وزير سابق وكبير مهندسي حزب الاستقلال “العتيد” ، ومع ذلك فشل في وضع تصور وبرنامج د الجهة، واستعان بمكتب دراسات أمريكي أعطاه 864 مليون سنتيم مقابل الانشاء والخوا الخاوي!!!
سير على الله اسي معزوز
مافيها والو!!!
▪︎(تدوينة الزميل يوسف الساكت نعيد نشرها بإذن منه)
